2026 жылдың 1–2 қазан күндері Ақтөбе облысы әкімдігінің қолдауымен М.О. Әуезов атындағы Әдебиет және өнер институты, Қ. Жұбанов атындағы өңірлік университеті және Ақтөбе облыстық тарихи-өлкетану музейінің бірлесуімен «Түркі халықтарының рухани мұрасы әлемдік өркениет аясында: «Қобыланды батыр» жыры» тақырыбында Халықаралық ғылыми-теориялық конференция өткізілді.
Қазақтың батырлық эпосында айрықша орын алатын «Қобыланды батыр» жыры – ұлттық мәдениеттің аясынан асып, жалпы түркілік эпикалық дәстүрмен сабақтасып жатқан іргелі мұра. Жырдың ғасырлар бойы халық жадында сақталып, бірнеше нұсқада жетуі оның көркемдік қуатымен қатар, тарихи-мәдени өміршеңдігін де танытты.
Конференцияның мақсаты – «Қобыланды батыр» жырын ЮНЕСКО көлемінде материалдық емес мәдени мұра тізіліміне енгізу мүмкіндіктерін және фольклорлық мұраны сақтау, қазіргі мәдени кеңістікте жаңғырту мәселелерін талқылау болды. Сонымен қатар жырдың тарихи-мәдени, әдеби және рухани маңызын зерделеуге, оның түркі халықтарының ортақ эпикалық мұрасындағы орнын айқындауға бағытталды.
Халықаралық ғылыми-теориялық конференция жұмысына отандық және шетелдік, атап айтқанда Түркия, Өзбекстан, Қырғызстан, Әзербайжан және Ресей Федерациясының эпостанушы, фольклортанушы, тілтанушы және әдебиеттанушы жетекші ғалымдары қатысты.
