5 мамыр күні Ақтөбе облыстық тарихи-өлкетану музейінде «Көктем көркі — қызғалдақ» атты тарихи-танымдық шара өтті. Шара мақсаты — жойылудың аз-ақ алдында тұрған, сирек кездесетін қызғалдақтарды қорғау.
Ақтөбе — шренк қызғалдағының отаны. Шренк қызғалдағы қорғауға алынып, Қазақстанның Қызыл кітабына енгізілген. Ерекше әсем көркімен дараланатын қызғалдақтың Отаны Қазақстан болып саналады. Бүгінде жер жүзінде 3 мыңнан астам түрі бар. Зерттеуші ғалымдар біздің топырақта өсіп-өнген қызғалдақтың тұқымы Ұлы Жібек жолы арқылы Түркияға кейін Тайландқа жеткенін анықтады. Отанынан басқа жерлерде тамырланған қызғалдақ тұқымының алыс шетелдердегі жаңа түрлері өсіп-өнді.
Сонымен қатар шара аясында музей қорында жинақталған қызғалдақтар мен өсімдік тектес этнографиялық заттардан жасақталған көрме ұйымдастырылды.
Шараға Шығармашылық академиясының көркемдік бейнелеу үйірмесінің жетекшісілері мен тәрбиеленушілері, Қ.Жұбанов атындағы Ақтөбе өңірлік университеті жаратылыстану факультетінің студенттері мен оқытушылары қатысты.
