22 қыркүйек күні ҚР Бас Прокуратурасында Қазақ КСР прокуроры, ҚР еңбек сіңірген заңгері Өтеген Сейітовтің 100 жылдығына арналған «Құқық қорғау қызметінің өзекті мәселелері» тақырыбында халықаралық ғылыми-тәжірибелік конференциясы өтті. Аталған шара аясында «Өтеген Сейітов: абыройлы қызмет және өнегелі өмір» атты музей қорындағы экспонаттардан жасақталған жылжымалы көрме ұйымдастырылды. Сондай-ақ, Құқық қорғау органдарының академиясында Ө.Сейітов атындағы Мәжіліс залының салтанатты ашылу рәсімі өтті.
ҚР Бас прокурорының тапсырмасымен 2023 жыл прокуратура органдарында «Ө.Сейітов жылы» болып жарияланды. Осыған орай мемлекет және қоғам қайраткерінің өнегелі өмір жолы мен қызметін дәріптеу мақсатында өткен көрме экспозициясына ҚР Прокуратурасының қалыптасуы мен даму тарихынан және оның өмірі мен еңбек жолынан сыр шертетін суреттердің көшірмелері, қызметтік киімдері, куәліктері, марапаттары, жеке тұтынған заттары мен бюстысы қойылды.
