ҚР Тұңғыш Президенті — Елбасы Нұрсұлтан Назарбаевтың «Болашаққа бағдар: Рухани жаңғыру» бағдарламалық мақаласын жүзеге асыру аясында еліміздің Мәдениет және спорт министрлігінің ұйымдастыруымен «Рухани қазына — 2021» онлайн фестивалі өткен болатын. Республикалық фестиваль қорытындысында облыстық тарихи-өлкетану музейі «Үздік облыстық маңызы бар мемлекеттік музей» номинациясы бойынша жеңімпаз атанып, облысымыздың мерейін үстем етті.  

Байқау шарттары бойынша бақ сынасқан музейдің фестивальге 2019-2021 жылдардағы негізгі кәсіби жетістіктері жөнінде портфолио, слайд және атқарылған жұмыстар бағытында бейнематериал дайындалып жіберілді. Фестиваль қорытындысында қазылар алқасы музей жұмысын жоғары бағалады.

Бүгін Мәдениет және өнер қызметкерлерінің кәсіби мерекесінде Көкшетау төрінде өткен салтанатты шарада Ақмола облысы әкімінің орынбасары музей директоры Мейрам Дүйсенғалиді ұжымның осынау үлкен марапатымен құттықтап, Мәдениет және спорт министрлігінің атынан арнайы Дипломы және ақшалай сыйлығын табыстады.

Айта кетсек, «Рухани қазына — 2020» республикалық байқауында музей «Үздік мемлекеттік музей сайты» номинациясын иеленген болатын.

Музей ұжымын жетістіктерімен құттықтап, шығармашылық табыстар тілейміз!