Ақтөбе облыстық тарихи-өлкетану музейінің 95 жылдығына орай өткізілетін "Ғылым биігіндегі тұлғалар" тақырыбындағы көрменің ашылуы өтті.
25 желтоқсан күні Ақтөбе облыстық тарихи-өлкетану музейінің 95 жылдығына орай «Ғылым биігіндегі тұлғалар» тақырыбында облыс пен республиканың ғылымына, мәдениеті мен өнеріне, медицина және өнеркәсіптің дамуына өлшеусіз үлес қосқан белгілі зерттеушілердің еңбек жолдарын насихаттауда көрме ұйымдастырылып өткізілді.
Мақсаты: Ғылым биігіндегі ақтөбелік тұлғалардың ұлы есімдерін кеңінен таныту. Өлке тарихын біле отыра, зерттеу жолындағы ғалымдардың ұлағатты еңбектерін насихаттау арқылы ізгілендірілген қоғамдық өмірге ілесе алатын, бәсекеге қабілетті ойшыл, шығармашыл жаңа ұрпақты қалыптастыру. Тұлғаларымыздың тарихтағы алар орнын ұғындырып, еңбексүйгіштікке жастардың құштарлығын арттыру.
Көрме экспозициясына өңірімізде әр салада еңбек еткен ғалымдар, зерттеушілердің жеке тұтынған заттары, еңбектері және мемлекеттік марапаттары қойылды. Олардың қатарында: өнер-табыс, республикалық және халықаралық деңгейдегі патенттері, алғашқы кең орындарын ашушыларының жетістіктерінен тарихи құжаттар және суреттер бар.
